Rusiye uquq qoruyıcıları işğal etilgen Qırımnı Rusiyenen bağlağan Keriç köprüne qarşı darbelerge çağırğan Aqyar sakinini tuttı. Bu aqta RİA Novosti yaza.
Berilgen malümatqa köre, erkek Telegramda ava telükesi ilânına izaat qaldırğan.
«Bundan ğayrı, erkek bir qaç akkaunt açıp, uçucısızlarnıñ Moskvağa ücümlerini aqlağan, yarımadağa raketa ücümlerine çağırğan ve qoltutqan», – dep aytıla haberde.
Oşağan bir adise Canköy rayonında oldı. Rusiye uquq qoruyıdcıları sakinge qarşı Telegram izaatları sebebinden cinaiy dava açtı. Adam Rusiyeni işğal etilgen Qırımğa bağlağan köpürni yoq etmege çağırğan eken.Ukrayina prezidentiniñ Qırım Muhtar Cumhuriyetindeki temsilciligi Roskomnadzor Qırım da olğan Ukrayinanıñ Rusiye tarafından işğal etilgen topraqlarındda kontrolni quvetleştire, dep haber etti.
Berilgen malümatqa köre, Rusiye müessisesiniñ emrinen internet provayderleri internet ağına bağlanğan bütün cihazlarnıñ IP adreslerini, geolokatsion malümatını, ağğa irişmek içün qullanılğan bütün cihazlarnıñ identifikatorları, qullanılğan programmalar ve internet trafiki aqqında malümatnı toplap Roskomnadzorğa bermeli.
Rusiyede ve onıñ tarafından işğal etilgen topraqlarda quvetçiler Ukrayina tarafdarlarını taqip eteler. Rusiye tarafdarı qırımlı bloger Aleksandr Talipov öz telegram kanalında Ukrayinağa qoltutqan qırımlılarnıñ şahsiy malümatlarını derc ete. Böyle şikâyetlerniñ neticesinde qırımlılar RF ordusını «areketsizleştirgenleri» içün yaqalana ve memuriy ve cinaiy mesüliyetke çekile.
«KrımSOS» aq qorçalayıcı teşkilâtınıñ malümatına köre, 2024 senesi eñ az 56 qırımlı Rusiye akimiyeti tarafından taqip etildi. Cinaiy davalarnıñ sebebi Rusiyede yasaqlanğan teşkilâtlarnen bağlar, devlet hainligi, casuslıq, açıq fikir bildirüvleri, diversiyalar ya da zorbalıq çağıruvlarında qabaatlavlar olğan.
