Frenkistan sentâbr ayında BM Baş Assambleyasınıñ sessiyasında Filistin devletini tanıycaq. Bu aqta cumaaqşamı künü Frenkista prezidenti Emmanuel Makron bildirdi.
O, Filistin muhtariyetiniñ başı Mahmud Abbasqa yazğan mektübiniñ kopiyasını X içtimaiy ağında derc etti.
Mektüpte bu qarar, Makronnıñ fikirince, Yaqın Şarq zıddiyetini barışıq yolunen çezmege yardım etecektir, dep aytıla.
Böyleliknen, Frenkistan tek filistinlilerniñ devletçilik aqqını degil, Filistin devletini resmiy şekilde tanığan birinci büyük ğarbiy devlet olacaq.
Aynı şu künü İngiltereniñ baş naziri Keir Starmer Gazzede tez vaqıtta ateş toqtatılmasına çağırdı ve gumanitar felâkette mesüliyet İsrailge ait, dep bildirdi. Starmer yaza ki, İngiltere de Filistin devletini tanıycaq, amma Gazzede ateşkes olğan soñ.
Filistin devletiniñ mustaqilligini al-azırda BMniñ 193 aza devletinden 150-ge yaqını tanıy. Hususan ABD ve İsrail onı tanımağa razı olmay. BM qararlarına köre, devletniñ toprağı Urdunnıñ Ğarbiy yalısı, Gazze ve Şarqiy Qudustan ibaret olmaq kerek, amma İsrail böyle sıñırlarnen razı degil.
Gazze qısmen ABD ve AB tarafından terrorist olaraq tanılğan «Hamas» gruppasınıñ nezareti altında buluna. Ateşkes ve «Hamasnıñ» elinde qalğan reinelerni azat etmek içün doğrudan-doğru muzakereler şimdige qadar iç bir netice bermedi. İsrail ve ABD vekilleri Qatarnı terk etti ve şimdi «Hamasnıñ» soñki tekliflerini inceley, dep haber ete Reuters. ABD mahsus vekili Steven Witkoff «Hamas» yahşı niyetnen areket etmegenini aytıp, «reinelerni evlerine qaytarmaq ve Gazze halqı içün daa stabil müit yaratmaq içün alternativ variantlar baqılacağını» qayd etti. O, tafsilâtlı malümat bermedi.
Gazzede İsrailniñ arbiy operatsiyası devam ete. Gumanitar yardımnıñ kelmesi zor, halqara teşkilâtlar açlıq telükesi aqqında bildire.
Cenk areketleri 2023 senesi oktâbr ayından berli devam ete, «Hamas» İsrailniñ cenübine ücüm etken ve 250-den ziyade insannı esir alğan edi. İsrail operatsiyası neticesinde ise on biñlernen Gazze sakini can berdi. Ğarpnıñ bir çoq memleketi İsrailni daa sert tenqit etip başladı.
