Kefe ve Kezlevde Rusiye arbiyleri atışlı talimler keçire, dep haber ete iyulniñ 25-nde Rusiye akimiyeti içtimaiy ağlardaki saifelerinde.
Rusiye kontrolindeki Kefe memuriyetiniñ haberine köre, şeerde talim atışları yerli saatnen 22:00-ğa qadar devam etecek.
«Bugün saat 11.00-den 22.00-ge qadar talim atışlarınıñ keçirilmesi planlaştırıla. Gidrotsikllarnen limanğa yaqlaşmañız!», – dep aytıla haberde.
Kezlevniñ Rusiye memuriyeti şeerde Rusiye arbiy talimlerinen bağlı küçlü sesler aqqında tenbiledi.
«Bugün saat 14.00-ke qadar arbiylerniñ talimleri keçirilecek, dep haber etemiz. Küçlü sesler eşitile bile. Raat olmağa rica etemiz», – dep bildirdi memuriyet.
Qırımtatar resurs merkezi esaplağanına köre, 2024 senesi Rusiye Qırımda eñ az 124 arbiy talim keçirdi. Keçken yıllarğa baqqanda büyük artış bar: 2023 senesi 40 talim, 2022 senesi 20 talim, 2021 senesi 44 talim keçirilgen edi.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti «Ukrayina uçucısızlarına» qarşı atış, «ava mudafaasınıñ işi» ve Rusiye arbiyleriniñ «talimleri» dep ayta. Yarımadada arbiy hızmetniñ reklaması yapıla ve Rusiye Silâlı Quvetlerine qoşulmağa çağıralar. Aq qorçalayıcılar qayd etkenine köre, böyle areketler halqara uquqnı boza.
