Sudaqta Rusiye akimiyeti yerli soqaqlarnıñ qırımtatar adlarınen levhalar alına, olarnıñ yerine rus tilinde soqaq adları qoyula. Bu aqta Qırım.Aqiqatqa yerli ülkeşınas gizli qalmaq şartınen bildirdi.
Ülkeşınasnıñ malümatına köre, laf hususan Açıqlar rayonı aqqında kete – mında keçken seneniñ doqsanları başında qaytqan qırımtatarlar ev qurmaq içün topraqlarını keri aldı.
«Mında toplu şekilde yaşaylar, şu sebepten halq soqaqlarğa özü ad berdi. 2014 senesinden soñ Ukrayinağa qoltutmağa devam etken qırımtatarlar yañı akimiyetniñ Qırımda olğan Rusiye uquq alanında topraq damartılarını qayd etmedi. Böylece, memuriyet içün topraq damartıları şahsiyleştirilmegeninden soqaq-yol ağı yoq edi. Şunıñ içün Sudaq şeer şurasınıñ ekinci çağırılış 27-nci sessiyasınıñ 2020 senesi oktâbrniñ 29-nda alınğan №190 qararına köre, soqaq-yol ağınıñ elementleri yañı resmiy adlar aldı, episi rusça qayd etildi. Beş yıl beklep akimiyet soqaqlarnıñ qırımtatar adları resmiy status taşımay ve vesiqada bile tasdıqlanmağan dep, soqaqlarnıñ qırımtatar adları olğan levhalarnı alıp taşlağan», – dep tarif etti Qırım.Aqiqatqa ülkeşınas.
Ülkeşınasnıñ aytqanına köre, Sudaq Rusiye memuriyetiniñ bu teşebbüsi em şeerdeki milletlerara amanlıqqa, em kurortnıñ turistik potentsialına zarar ketire.
«Ebet, Açıqlar sakinleri akimiyetniñ teşebbüsine açuvlana, amma qararlı areketler yapamay, çünki ekstremistler cedveline oğrarlar. Qayd etmeli ki, bir çoq Rusiye turisti bile bu rayonda ilk sefer qalmayıp, soqaq levhalarından yoq olğan eski adlarğa yazıqsına, çünki bu da Açıqlarnıñ hususiyeti edi», – dep qayd etti ülkeşınas.
Mayısta qırımlı aq qorçalayıcılardan biri Qırım.Aqiqatqa işğal etilgen Qırımda Umumrusiye halq cebesiniñ teşebbüsi olğan ve Qırımnıñ Rusiye akimiyeti tarafından qoltutulğan mekteplerge Rusiye «SVO qaramanlarınıñ» (Rusiye Ukrayinağa qarşı büyük cenkni böyle adlandıra – QA) adlarını berüv büyük leyhası yerine ketirile, dep aytqan edi.
